ҚазҰМУ-да Дүниежүзілік денсаулық күніне орай ауқымды флешмоб өтті
7 сәуір күні Дүниежүзілік денсаулық күніне арналған іс-шараға студенттер, оқытушылар, университет қызметкерлері, сондай-ақ ректор Марат Шоранов және Дүниежүзілік денсаулық сақтау ұйымының Алматыдағы алғашқы медициналық-санитарлық көмек жөніндегі Еуропалық орталығының жетекшісі, доктор Мелитта Якоб қатысты.
Флешмоб дене белсенділігі, аурулардың алдын алу және салауатты өмір салтын қалыптастыру мәселелеріне арналды. Бағдарлама аясында қатысушылар жаттығуға қатысса, йога сабағын ҚазҰМУ-дың доценті, биология ғылымдарының кандидаты, 60 жылға жуық тәжірибесі бар биохимия кафедрасының оқытушысы, кәсіби йога нұсқаушысы Сара Саид-Алиевна Ерджанова өткізді.
Ректор Марат Шоранов Дүниежүзілік денсаулық күні жыл сайын 7 сәуірде Дүниежүзілік денсаулық сақтау ұйымы 1948 жылы құрылған күні атап өтілетінін еске салды. Оның айтуынша, денсаулық тақырыбы медицина саласы үшін ғана емес, әр адамның күнделікті өміріндегі жауапкершілікпен, өмір салтымен және әдеттерімен тығыз байланысты.
Сондай-ақ ол доктор Мелитта Якобтың алғашқы медициналық-санитарлық көмекті дамыту мен қоғамдық денсаулық қағидаттарын ілгерілетудегі еңбегін ерекше атап өтті.
Ұйымдастырушылардың айтуынша, флешмоб тек мерекелік іс-шара емес, сонымен қатар денсаулыққа қамқорлық дәрігерге жүгінуден бұрын басталатынын, күн тәртібі, ішкі тепе-теңдік және өз-өзіне деген мұқият қарым-қатынас арқылы қалыптасатынын еске салу мақсатында өткізілді.
