ҚазҰМУ ТМД-ның болашақ хирургтарын біріктірді
Өткен аптада Алматы халықаралық медициналық өмірдің эпицентріне айналды — С.Д. Асфендияров атындағы Қазақ ұлттық медицина университетінің базасында академик А.А. Идрисовты еске алуға арналған хирургия және топографиялық анатомия бойынша IV Халықаралық студенттік олимпиада өтті.
Бұл жай ғана жарыс емес. Бұл — ҚазҰМУ-дың бүгінде өңірдегі үздік медициналық ой иелерін өзіне тартатын орталыққа айналғанының айқын дәлелі.
ТМД елдерінің түкпір-түкпірінен Алматыға 10 жетекші медициналық университеттің студенттері жиналды: Қазақстан, Ресей, Өзбекстан және Қырғызстаннан. Новосибирск, Ташкент, Самарқанд, Термез, Бішкек, Астана, Ақтөбе, Қарағанды — қатысушылар географиясы көп нәрсені аңғартады. ҚазҰМУ — нағыз кәсіби сынақтан өтуді қалайтындар келетін орынға айналды.
Ал мұндағы сынақтар оңай емес. 18 кезеңнен тұратын байқау тапсырмаларының әрқайсысы шынайы операциялық жағдайларға барынша жақындатылған. Асқазанды резекциялау, аортокоронарлық шунттау, дурапластикамен трепанация жасау, өкпе бөлігін резекциялау, емізік-ареолярлық кешенді реконструкциялау, тамырлық және ішек тігістерімен жұмыс істеу — бұлар қағаздағы теориялық тапсырмалар емес. Бұл — нақты уақыт режимінде қабылданатын шешімдер.
Қатысушылар сондай-ақ «Пирогов» интерактивті үстелінде жұмыс істеп, симуляциялық тапсырмалардан өтті, шұғыл көмек пен акушерлік жағдайларды талдады — бір сөзбен айтқанда, шынайы клиникалық тәжірибені бастан өткерді. Дәл осындай тәсілді ҚазҰМУ ұстанады: тек жаттап алу емес, істей білу.
Олимпиада көрнекті хирург, ғалым және педагог, қазақстандық медицина мектебінің дамуына зор үлес қосқан академик Алим Акрамұлы Идрисовты еске алуға арналды. Бұл іс-шараны ҚазҰМУ қабырғасында өткізу — оның ісін жалғастыру деген сөз: жоғары талапты қалыпты жағдай ретінде қабылдайтын дәрігерлер буынын тәрбиелеу.
