ҚазҰМУ ректоры Талғат Нұрғожиннің Ұстаздар күнімен құттықтауы
Құрметті әріптестер! Дәстүр бойынша жылда университетіміз Ұстаздар күнін атап өтеді, биыл да кезекті рет атап өтіп жатырмыз. Біздің университетке тек үздік студенттер ғана түседі. Оның ішінен де дәрігер атына лайықтылар іріктелмек. Киелі шаңырағымызда біз студенттерімізге үнемі өз білімдерін жетілдіріп қана қоймай, сонымен қатар жанашыр болуға, жақындарымызға қамқорлық көрсетуге, жанқиярлыққа және қазақстандықтардың денсаулығын сақтау үшін қолдан келгеннің бәрін жасауға үйретеміз. Өйткені, біз үшін ең үлкен марапат — науқастың алғысы.
Белгілі жазушы Генри Адамс «Мұғалім мәңгілікке әсер етеді, ол әсерін қай жерде тоқтататынын ешқашан айта алмайды» деген. Мінекей, бүгінде ҚазҰМУ- құрылғаннан бері 90 жыл ішінде бізде білім алып кеткен студенттеріміз қазақстандық дәрігерлердің үштен бірін құрап отыр, олар әлемнің 17 елінде жұмыс істеп, бізді өз жетістіктерімен үнемі қуантып келеді.
Біздің студенттер коронавирус пандемиясы кезінде өздерін лайықты көрсете білді, қазақстандықтарды індеттен қорғауға алғашқы болып көмек көрсетті. Мұның бәрі олардың университет қабырғасында алған тәрбиесінен, атап айтқанда мұғалімдердің лайықты үлгі көрсетулерінің арқасында. Менен ҚазҰМУ-да білім алған мамандарымыздың, студенттеріміздің көмегін сұрап келгенде бойымда ерекше қуаныш сезімі ұялайды.
Қазір біздің университет жоғары білімнің флагманы,ең мықты клиникалық базалар мен ғылыми-зерттеу институттарын қамтитын зерттеу университеті болып табылады. Біздің университеттік клиникаларымыз Қазақстанның денсаулық сақтау саласында үлкен рөл атқара отырып, бірегей медициналық қызметтерді көрсетеді. Алайда, университет студенттерсіз бола алмас еді, ал студенттер оқытушылардың қамқоры мен көмегінсіз білім ала алмас еді.
Ежелгі грек философы Плутарх: «Ақыл – бұл толтырылатын ыдыс емес, оны тұтатуға болатын от» депті. Мен біздің оқытушыларымызға өздері тәрбиелеп, оқытқан білім алушылары үлкен белестерді бағындырып, еңбектерінің жемісті болуын тілеймін. Және де барлығымызға ҚазҰМУ-дың беделін әрқашанда биік ұстап, үздік білім ордасы атағын ылғи дәлелдеп отыруға күш-қуат, парасаттылық тілеймін.
Қадірлі ұстаздар, еңбектеріңіз бағаланып, марапаттарыңыз еселене берсін!
