ҚазҰМУ базасында «Астма және аллергия» атты XXVI Ұлттық Қазақстандық халықаралық форум өтті

Алматы қаласында «Астма және аллергия» атты XXVI Ұлттық Қазақстандық халықаралық форум өз жұмысын аяқтады. 29–30 сәуір күндері өткен екі күндік шара барысында әлемнің жетекші аллергологтары мен иммунологтары биологиялық препараттар, жасанды интеллект және «аллергиясыз әлем» тұжырымдамасы туралы өзекті мәселелерді талқылады.

Форумды ҚазҰМУ-дың аллергология және клиникалық иммунология кафедрасы және Қазақстандық аллергологтар мен клиникалық иммунологтар қауымдастығы ұйымдастырып, ол Еуропалық аллергология және клиникалық иммунология академиясы (EAACI) қолдауымен өтті. Шараға Қазақстанның барлық өңірлерінен дәрігерлер, сондай-ақ Испания, Ұлыбритания, Франция, Грузия, Үндістан және Израиль елдерінен келген халықаралық сарапшылар қатысты.

Форум Қазақстан Республикасы Денсаулық сақтау министрлігінің ғылыми-практикалық іс-шаралар жоспарына енгізілген және аллергология, клиникалық иммунология мен респираторлық медицина саласындағы маңызды кәсіби алаңдардың бірі болып саналады. Оның өзектілігі аллергиялық және иммунологиялық аурулардың жаһандық деңгейде тұрақты өсуімен байланысты.

Дүниежүзілік денсаулық сақтау ұйымының мәліметтері бойынша, бронхиалды астма – ең кең таралған созылмалы жұқпалы емес аурулардың бірі әрі балалар арасындағы ең жиі кездесетін созылмалы дерт. 2023 жылы әлемде шамамен 363 миллион адам астмамен ауырған, ал бұл ауру 442 мың өлім жағдайына себеп болған. Ал аллергиялық ринит халықтың 10–30%-ын қамтыса, аллергендерге сезімталдық 40%-ға дейін жетеді.

Форум жұмысына халықаралық деңгейдегі жетекші сарапшылар қатысты: EAACI президенті Мария Хосе Торрес, EAACI бас хатшысы Мохамед Шамджи, ARIA президенті Жан Буске, EAACI ғылым жөніндегі вице-президенті Оскар Паломарес, сондай-ақ грузиялық профессор Майя Готуа. Мұндай құрам форумның жоғары халықаралық мәртебесін айқындайды.

Екі күн ішінде қатысушылар бронхиалды астма, ауыр астма және биологиялық терапия, дәрілік гиперсезімталдық, анафилаксия, аллергиялық ринит, атопиялық дерматит, созылмалы есекжем, тұқым қуалайтын ангионевротикалық ісіну, тағамдық аллергия, бастапқы иммун тапшылықтары, микробиом, эпителиалдық тосқауыл, сондай-ақ экология мен климат өзгерісінің әсері сияқты өзекті тақырыптарды талқылады. Сонымен қатар молекулалық аллергология, аллерген-спецификалық иммунотерапия, прецизионды медицина және жаңа диагностикалық технологияларға ерекше назар аударылды.

Форумның алғашқы күні халықаралық сарапшылар соңғы ғылыми деректер мен клиникалық тәжірибелерді ұсынды. Ал екінші күні атопиялық дерматит, T2-қабыну, ауыр астма және иммун тапшылықтары бойынша талқылаулар жалғасты. Практикалық бөлім аясында спирография бойынша шеберлік сабағы өтті.

Форум аясында шетелдік сарапшылардың студенттермен кездесуі ерекше маңызға ие болды. Олар халықаралық ғылыми мүмкіндіктер туралы айтып, болашақ мамандардың сұрақтарына жауап берді. Студенттердің қызығушылығы жоғары болып, олар пікірталастарға белсенді қатысты.

Профессор Оскар Паломарес форумның жоғары деңгейде ұйымдастырылғанын атап өтті. Ал профессор Майя Готуа жастардың ғылымға қызығушылығы мен халықаралық қауымдастықтарға қосылу мүмкіндіктерінің маңызын ерекше атап өтті.

Форумда жас ғалымдарға арналған секция да өтті. Резиденттер анафилаксия мен жасанды интеллект, генетикалық деректер негізінде тәуекелді болжау, тағам аллергендерін анықтауда нейрондық желілерді қолдану, ауыр астмадағы биологиялық терапияны жекелендіру сияқты тақырыптарда баяндамалар жасады.

Форум қорытындысын ҚазҰМУ-дың аллергология және клиникалық иммунология кафедрасының меңгерушісі, профессор Жанат Испаева шығарды. Оның айтуынша, форум ғылымды дамытуға, жас мамандарды қолдауға және пациенттерге көрсетілетін медициналық көмектің сапасын арттыруға бағытталған.

Форум нәтижесінде қатысушылар баяндамалардың жоғары ғылыми деңгейін, практикалық маңызын және халықаралық ынтымақтастықтың маңыздылығын атап өтті. XXVI «Астма және аллергия» форумы аяқталғанымен, оның басты нәтижесі – ҚазҰМУ студенттерінің әлемдік аллергология саласында мансап құруға деген қызығушылығының артуы болды.