ҚазҰМУ биохимия кафедрасының доценті Ерджанова Сара Саид-Алиевнаны 85 жас мерейтойымен құттықтайды
С.Ж. Асфендияров атындағы Қазақ ұлттық медицина университеті биохимия кафедрасының доценті, университет мақтанышы Ерджанова Сара Саид-Алиевнаны 85 жас мерейтойымен шын жүректен құттықтайды. Саналы ғұмырын медицина мен білім саласына арнаған ұстаздың өмір жолы – мамандыққа адалдықтың, табандылық пен сарқылмас жігердің жарқын үлгісі.
Сара Саид-Алиевна медицина саласындағы еңбек жолын 1958 жылы медициналық институтқа оқуға түскен сәттен бастады. Осы кезеңнен бастап оның ғылым мен білімге, болашақ дәрігерлерді даярлауға арналған үлкен жолы бастау алды. Жоғары оқу орнын тәмамдағаннан кейін биохимия саласына ден қойып, ғылыми диссертациясын қорғады және педагогикалық қызметке кірісті. Бүгінде оның ұстаздық жолы алпыс жылға жуық уақытты қамтиды.
Сара Саид-Алиевна бүгінде университеттің құрметті ұстаздарының бірі саналады. Оның дәрістері мен тәжірибелік сабақтарынан мыңдаған студент білім алды. Ол биохимия пәнін терең әрі жүйелі оқытып, болашақ дәрігерлердің кәсіби қалыптасуына зор үлес қосып келеді. Қазақ және орыс тілдерінде дәріс оқып, оқу үдерісін жетілдіруге тұрақты түрде атсалысып келеді.
Сара Саид-Алиевна университетте білікті педагог әрі ғалым ретінде ғана емес, салауатты өмір салтын насихаттаушы ретінде де танымал. Қырық жылдан астам уақыт бұрын ол емдік-сауықтыру гимнастикасы секциясын ұйымдастырып, осы бағыттағы жұмысын үздіксіз жалғастырып келеді. Бүгінде 85 жасында да йога нұсқаушысы ретінде белсенді еңбек етіп, сергектік пен өмірге деген белсенді ұстанымның үлгісін көрсетіп келеді.
ҚазҰМУ үшін Ерджанова Сара Саид-Алиевна сынды ұстаздардың орны ерекше. Оның саналы ғұмыры, білім мен ғылым жолындағы қажырлы еңбегі, білікті маман даярлауға қосқан үлесі университет тарихымен тығыз сабақтасып жатыр.
Университет ұжымы Сара Саид-Алиевнаны 85 жас мерейтойымен шын жүректен құттықтап, зор денсаулық, отбасына амандық пен бақ-береке тілейді және шәкірттерінің ыстық ықыласына бөлене беруіне тілектестік білдіреді.
