ҚазҰМУ WEBOMETRICS әлемдік рейтингтің қазақстандық жоғары оқу орындарының ТОП-5 қатарына қайта енді

Webometrics Ranking of World Universities 2022 жылғы қаңтардағы соңғы рейтингі жарияланды. Оның нәтижелеріне сәйкес С.Ж. Асфендияров атындағы Қазақ ұлттық медицина университетінің сайты қазақстандық жоғары оқу орындары арасында Webometrics жаһандық рейтингінің ТОП-5 енді, ал еліміздің медициналық университеттері арасында ҚазҰМУ кезекті рет даусыз көшбасшыға айналды.
Webometrics (Webometrics Ranking of World Universities) рейтингін ұлттық зерттеу кеңесінің (Испания) Cybermetrics тобы есептейді және университеттердің ғылыми-зерттеу жетістіктеріне, интернет-кеңістіктегі ықпал етуіне, сондай-ақ ЖОО веб-сайттарының танымалдылығына сүйене отырып айқындалады. Рейтинг деректері жылына екі рет – қаңтар мен шілдеде есептеледі.
Webometrics әлемнің 30 мыңнан астам оқу орындарын талдайды. 2022 жылдың қаңтарында рейтингке Қазақстан Республикасының 130 білім беру мекемесі кірді.
Рейтингке әлемнің 30 мыңнан астам ЖОО қатысады, ҚазҰМУ әлем бойынша 4345 орында және континент бойынша 1488 орында тұр. Рейтингке Қазақстаннан барлығы 130 ЖОО қатысты. Бірінші орынды 983 жаһандық позициясымен Назарбаев Университеті иеленді. Екінші орында Әл-Фараби атындағы ҚазҰУ, үшінші орында — Л.Н.Гумилев атындағы ЕҰУ. Төртінші орынды Қ.И.Сәтпаев атындағы ҚазҰТУ иеленген.
Медициналық университеттер арасында екінші орынды Қазақстан бойынша рейтингтің 20 қатарында және әлем бойынша 11852 позициясында орналасқан Астана медицина университеті, Қарағанды медицина университеті 44 орында, Семей медицина университеті 46 орында, БҚММУ 50 орында, ҚРМУ 85 орында тұр.
Жақында ҚазҰМУ 2021 жылдың қорытындысы бойынша ҚР Білім және ғылым министрлігінің рейтингісінде жетекші орынға ие болды. Университет «Денсаулық сақтау және әлеуметтік қамтамасыз ету» бағыты бойынша бірінші орында тұр. Жоғары оқу орындарының білім беру бағдарламалары үш блокқа біріктірілген 19 критерий бойынша бағаланды: түлектердің мансаптық болашағы, білім беру бағдарламаларының сапасы және оқушылардың жетістіктері.
Қазіргі уақытта университеттің 84 жеке білім беру бағдарламалары бар. Олардың ішінде 8 бірлескен білім беру бағдарламасы және екі қос диплом бағдарламасы бар. 2021 жылы ҚазҰМУ әлемнің ТОП-650 үздік университеттерінің қатарына енді. QS World University Ranking рейтингінде университетке #601-650 позиция берілді. ҚазҰМУ сондай-ақ QS EECA ЖОО рейтингісінің ТОП-150 құрамына кірді. ҚазҰМУ медициналық жоғары оқу орындары арасында «Денсаулық сақтауды дамыту республикалық орталығы» РМК білім мен ғылымды дамыту орталығының рейтингінде бірінші орынды, сондай-ақ Қазақстанның барлық университеттері арасында аккредиттеу және рейтингтің тәуелсіз агенттігі (IAAR) – 2021 ҚР жоғары оқу орындары қажеттілігінің Ұлттық рейтингінде бесінші орын алып тұр.