ҚазҰМУ-да Қазақстан халқының бірлігі күні аталып өтті
С.Ж. Асфендияров атындағы Қазақ ұлттық медицина университетінде Қазақстан халқының бірлігі күніне арналған салтанатты іс-шара өтті. «Бірлік – ел тұғыры» атты мерекелік бағдарлама студенттерді, оқытушыларды, этномәдени орталықтардың өкілдерін және университеттің шығармашылық ұжымдарын біріктірді.
Бұл мереке ҚазҰМУ үшін ерекше мәнге ие. Бүгінде университет еліміздегі ең халықаралық жоғары оқу орындарының бірі саналады. Мұнда Қазақстан бойынша шетелдік студенттердің ең көп саны білім алуда. Университет аудиторияларында, зертханаларында және клиникалық базаларында 40 мемлекеттен келген, 47 ұлт өкілдері бірге оқып жатыр.
Іс-шара барысында қатысушыларға ҚазҰМУ-дың Бірінші проректоры Қайдарова Диляра Радикқызы құттықтау сөз сөйледі. Ол өз сөзінде бұл мерекенің университет қабырғасында нақты мазмұнға ие екенін атап өтті.
«Медицинада ұлт болмайды. Дәрігер үшін ең бастысы адам өмірі. Біз студенттерге ең алдымен осы қағиданы үйретеміз», – деді Диляра Қайдарова.
Мерекелік бағдарлама ректорат алаңында өтті. Қонақтарға ұлттық тағамдар, қолөнер бұйымдары және студенттердің суреттері қойылған көрмелер ұсынылды. Сахнада қазақ, ұйғыр, әзербайжан, корей, украин, татар және басқа да халықтардың шығармашылық нөмірлері орындалды.
Концертке «Дала сазы» ұлттық аспаптар ансамблі, «Конкордиа», «Тансұлу», «Алтын белес», «Рухсан» би ұжымдары, ҚазҰМУ хор-вокал үйірмесі және этномәдени орталықтардың өкілдері қатысты.
Мерекенің ең әсерлі сәттерінің бірі Атамекен әнінің бірге орындалуы болды. Концертке қатысушылар мен қонақтар сахнаға шығып, бағдарламаны ортақ әнмен және естелік суретпен қорытындылады.
ҚазҰМУ-дағы Бірлік күні тек мерекелік іс-шара ғана емес, университет өмірінің маңызды бөлігі екенін көрсетті. Мұнда әртүрлі елдер мен мәдениеттерден келген болашақ дәрігерлер тек кәсіби білім алып қана қоймай, әр адамға құрметпен қарауды үйренеді.
Бүгінде ҚазҰМУ – түрлі тілдер мен мәдениеттер тоғысқан, бірақ барлығын бір мақсат біріктіретін үлкен халықаралық медициналық орта. Барлығын біріктіретін ортақ мақсат – адам денсаулығы мен өміріне қызмет ету.
