ҚазҰМУ AI Month және AI & Digital Bridge 2026 аясында AI-Sana көрмесінде жобаларын таныстырды
AI Month – Жасанды интеллект айлығы және AI & Digital Bridge 2026 халықаралық форумы аясында Astana IT University базасында Қазақстанның 20 жоғары оқу орнының студенттері мен жас әзірлеушілерінің жобаларын біріктірген AI-Sana көрмесі өтті.
С.Ж. Асфендияров атындағы Қазақ ұлттық медицина университеті көрмеге қатысып, жасанды интеллект технологиялары мен цифрлық шешімдерді түрлі салаларда қолдануға бағытталған екі жобасын таныстырды.
Таныстырылған жобалардың бірі – Алмат Джувашев әзірлеген, жасанды интеллект агенттері бар интеллектуалды аналитикалық IRBIS платформасы. Платформа деректерді жинау және өңдеу, статистикалық талдау, визуализациялау және есептерді дайындау үдерістерін бірыңғай цифрлық кеңістікте біріктіреді. Жобада деректерді қорғауға, нәтижелердің қайталанымдылығын қамтамасыз етуге және жасанды интеллект операцияларына аудит жүргізуге ерекше назар аударылған.
Екінші жоба – ерлердің репродуктивті денсаулығына әсер ететін қауіп факторларын цифрлық скринингтен өткізуге бағытталған «äke» жобасы. Жобаны КазҰМУ өкілдері Амангелді Айым Еділқызы мен Қындыбай Ақнұр Нұрболқызы кіретін «Ake Team» командасы таныстырды.
Қындыбай Ақнұр Нұрболқызы – «Клиникалық фармакология» мамандығының КФ26-02 тобының 1-курс резиденті және КазҰМУ Ғылыми-технологиялық паркінің резиденті болып табылатын «Ake Team» жобасының команда мүшесі.
«äke» мобильді қосымшасы ерлердің репродуктивті денсаулығына қатысты қауіп факторларын ерте бағалауға, күнделікті өзін-өзі бақылауға және пайдаланушылардың хабардарлығын арттыруға арналған. Қосымша анонимді түрде кіру, денсаулық күнделігін жүргізу, Health Score көрсеткіші, көрсеткіштер динамикасын талдау, AI-чат және одан әрі медициналық бағыттау бойынша ұсынымдар алу мүмкіндіктерін қамтиды. Бұл ретте қосымша диагноз қоймайды және дәрігердің консультациясын алмастырмайды.
Іс-шараға жасанды интеллект саласындағы жетекші ұйымдар мен сарапшылар қауымдастығының өкілдері, оның ішінде Қазақстан Республикасы Президенті жанындағы Жасанды интеллектіні дамыту жөніндегі кеңестің мүшесі Пол Ким, Alpha Intelligence Capital серіктесі және Mariton Partners басқарушы серіктесі әрі негізін қалаушы Ни Ли, сондай-ақ Halyk Bank Басқарма төрағасының орынбасары Нариман Мукушев қатысты.
Кездесу барысында жасанды интеллектіні дамыту, технологиялық жобаларды қолдау және ілгерілету, сондай-ақ жасанды интеллект саласына инвестициялар тарту мәселелері талқыланды. Қатысушылар кәсіби тәжірибелерімен бөлісіп, Қазақстанда жасанды интеллектіні одан әрі дамыту перспективаларын талқылады.
ҚазҰМУ-дың AI-Sana көрмесіне қатысуы студенттер, резиденттер және жас әзірлеушілер жүзеге асырып жатқан университеттің инновациялық әзірлемелерін таныстыруға, сондай-ақ жасанды интеллектіні ғылыми-зерттеу және медицина салаларында қолдану әлеуетін көрсетуге мүмкіндік берді.
Көрме тәжірибе алмасу, цифрлық шешімдерді таныстыру және қазақстандық жоғары оқу орындары арасында жасанды интеллект пен инновациялар саласындағы ынтымақтастықты дамыту үшін маңызды алаңға айналды.
