С.Ж.Асфендияров атындағы ҚазҰМУ-да М.О.Әуезовтың 125 жылдығына арналған «Дана Мұхтар» атты әдеби-танымдық кеш өтті
Ағымдағы 2022 жылдың 08 желтоқсаны күні, С.Ж.Асфендияров атындағы Қазақ ұлттық медицина университетінде қазақтың заңғар жазушысы, ғұлама ғалым, драматург Мұхтар Омарханұлы Әуезовтың 125 жылдығына арналған «Дана Мұхтар» атты әдеби-танымдық кездесу кеші өтті. Кездесуге М.О.Әуезов атындағы Әдебиет және өнер институты, «Әуезов үйі» ғылыми – мәдени орталығынан филология ғылымдарының кандидаты, доцент С.К.Майлыбай, бас қор сақтаушысы, жетекші ғылыми қызметкері С.А.Мукатаева, М.О.Әуезов атындағы Қазақ мемлекеттік академиялық драма театрының актері, «Құрмет» Орденінің иегері, Қазақстанның Еңбек сіңірген қайраткері Б.Ә.Әбділманов қатысты. Кездесуді ҚазҰМУ проректоры У.М.Датхаев алғы сөз сөйлеп, ашып берді. Кеш барысында шақырылған қонақтар жазушы М.О.Әуезов шығармашылығына тоқталып, «Әуезов үйі» мұражайын презентация арқылы әңгімелеп, таныстырып өтті. Актер Б.Ә.Әбділманов театрда жүріп жатқан «Абай жұмбағы» қойылымының сахналық нұсқасын жас жазушы М.Омаровамен бірлесе жазғанын, Абайдың образын жасау да үнемі ізденістердің болуымен қатар, кейіпкердің тұлғалық қасиетіне түгелдей болмаса да ұқсас жері, ортақ көзқарасы болуы керек екенін айтып, спектакльден үзінді оқып берді. Абай образын сомдауда сондай-ақ, Абай шығармашылығын зерттеуші ғалымдармен көп әңгімелескенін айтып өтті. Кеш соңында университет студенттері домбыра аспабында күй ойнап, М.Әуезовтың шығармашылығынан үзінді оқып, Абай өлеңдері мен әндерін орындады. Әлеуметтік-тәрбие жұмыстар департаментінің басшысы С.К.Махмутов қонақтардың шақыруды қабылдап, өз ойларын ортаға салғандары үшін рахметін айтты. Кездесуді жүргізген Тәрбие іс жөніндегі бөлімнің бас маманы С.А.Апсаттарова университет әкімшілігі атынан кездесуге келген қонақтарға гүл шоғын табыстап, алғысын жеткізді.
