Профессор Асхан Смаилов ҚазҰМУ-дың бірінші курс студенттерімен кездесті
Бүгін ҚазҰМУ-да Медицина мектебінің бірінші курс студенттері медицина ғылымдарының докторы, профессор Асхан Смаиловпен кездесті. Денсаулық сақтау саласында жарты ғасырдан астам еңбек еткен белгілі хирург жастарға дәрігерлік тәжірибесі туралы әңгімелеп, мамандық алдындағы жауапкершілік пен адамгершілік жөнінде ой бөлісті.
Еліміздің белгілі дәрігерлерімен кездесу өткізу ҚазҰМУ-да бұрыннан қалыптасқан дәстүр. Университет болашақ дәрігерлердің ұстаздарынан білім алып, отандық медицинаның дамуына еңбек сіңірген мамандардан тәлім алуына жағдай жасап келеді. Осындай кездесулерде студенттер аға буынның тәжірибесімен танысып, таңдаған мамандығының ерекшеліктерін, дәрігерге жүктелетін міндет пен жауапкершілікті тереңірек түсінеді.
Кездесу Абай Құнанбайұлының ой-тұжырымдарына негізделген «Толық адам» тұжырымдамасы аясында өтті. Оның негізінде білімді, адамгершілікті және қоғам алдындағы жауапкершілікті қатар дамыту ұстанымы жатыр. Дәрігер даярлауда бұл қағидалардың мәні зор. Кәсіби біліктілік, науқасқа жанашырлық пен құрмет дәрігердің бойынан қатар табылуға тиіс.
Асхан Смаилов Қазақстанда қан тамырлары хирургиясының қалыптасуына атсалысқан алғашқы мамандардың қатарында. Оның 55 жылдық еңбек жолы дәрігерлік тәжірибені, ғылыми ізденісті, денсаулық сақтау ісін ұйымдастыру мен шәкірт тәрбиелеуді қамтиды.
Мәскеуде кәсіби даярлықтан өткеннен кейін ол Алматыдағы Орталық қалалық клиникалық аурухананың қан тамырлары хирургиясы бөлімінде жұмысын жалғастырды. Мамандандырылған хирургиялық көмек барлық өңірде бірдей қолжетімді болмаған жылдары санитариялық авиациямен шұғыл операциялар жасауға талай рет ұшып барған. Мұндай жағдайда науқастың өмірі медициналық бригаданың жедел әрекеті мен хирургтің кәсіби шеберлігіне байланысты болатын.
Асхан Смаилов денсаулық сақтау ісін ұйымдастыру, медициналық мекемелерді басқару және маман даярлау салаларында да мол тәжірибе жинаған. Әр жылдары Алматы қаласының бас хирургі қызметін атқарып, №7 қалалық клиникалық аурухана мен №17 қалалық емхананы басқарды. Жас дәрігерлерді оқытуға, еліміздің өңірлеріндегі әріптестерімен тәжірибе бөлісуге ерекше көңіл бөлді.
2024 жылы отандық денсаулық сақтау саласын дамытуға қосқан көпжылдық үлесі үшін оған «Қазақстанның еңбек сіңірген қайраткері» құрметті атағы берілді.
Студенттермен әңгімесінде профессор дәрігердің кәсіби жауапкершілігіне, іргелі білімнің маңызына және өмір бойы білім алу қажеттігіне тоқталды. Сондай-ақ дәрігерге қажет адамдық қасиеттер туралы айтты.
«Бірінші курс студенттеріне ең алдымен айтарым, адамгершіліктің үлгісі болыңдар. Медицина қызметкерлері мейірімділігімен өзгелерге өнеге көрсетуі керек. Әдепті болыңдар, жақсы оқыңдар. Медицина адам денсаулығымен байланысты. Сондықтан бүгін бастаған оқуларың өмір бойы жалғасады», – деп атап өтті Асхан Смаилов.
Бірінші курс студенттері талай науқастың өмірін сақтап, елдегі денсаулық сақтау жүйесінің дамуына үлес қосқан дәрігердің әңгімесін тыңдады. Оның тәжірибесі арқылы дәрігерлік қызметтің күнделікті еңбегін, күрделі шешімдері мен жауапкершілігін жақынырақ таныды.
ҚазҰМУ белгілі дәрігерлермен, ғалымдармен және денсаулық сақтау ісін ұйымдастырушылармен кездесулер өткізу арқылы мамандар арасындағы ұрпақ сабақтастығын жалғастырып келеді. Университеттің кәсіби білікті, жауапты шешім қабылдай алатын, науқасқа жанашыр әрі дәрігерлік парызына адал маман тәрбиелеу мақсаты «Толық адам» тұжырымдамасының қағидаларымен үндеседі.
