Студенттер науқас балалар үшін 26 литр қан тапсырды
С. Ж. Асфендияров атындағы Қазақ Ұлттық медицина университетінің студенттері Халықаралық студенттер күні мен университеттің Студенттік үкімет ұйымының он бес жылдығына орай, Донорлар күнін өткізді. Болашақ дәрігерлер шын жүректерінен шыққан бұл қайырымдылық шарасын науқас балалардың өмірін құтқаруға арнады.
Болашақ дәрігерлердің донор болуға деген ықыластарын Алматы қалалық Қоғамдық денсаулық сақтау басқармасына қарасты Қалалық Қан орталығының ұжымы қуана құптады. Қан тапсыруға университеттің сексен студенті өтініш білдірсе, донор болудың басты талаптарына сәйкес, оның елу екісі ғана қан тапсыруға жолдама алды. Жас та болса, осындай сауапты да қайырымды іске ат салыса білген жастарға Орталық директоры, қалалық мәслихат депутаты Жандос Қуанышбекұлы Нәдіров өз ризашылығын білдірді.
https://almaty-akshamy.kz/studentter-naukas-balalar-yshin-26-litr-kan-tapsirdi
