Доктор Радмила Цой ESPID 2026 конгресіне қатысып, халықаралық CME/CPD сертификатын алды
С.Ж. Асфендияров атындағы Қазақ ұлттық медицина университетінің Неврология кафедрасының қауымдастырылған профессоры, медицина ғылымдарының докторы (PhD), дәрігер-невролог Радмила Тимсонқызы Цой 2026 жылғы 1–5 маусым аралығында Италияның Болонья қаласында және онлайн форматта өткен Еуропалық педиатриялық инфекциялық аурулар қоғамының 44-ші жыл сайынғы конгресіне (European Society for Paediatric Infectious Diseases – ESPID 2026) қатысты.
Конгресс қорытындысы бойынша Радмила Цой үздіксіз медициналық білім беру бағдарламасын сәтті аяқтағанын растайтын халықаралық CME/CPD сертификатына ие болып, 20 еуропалық білім беру кредитін (ECMEC®s) алды.
ESPID – инфекциялық аурулар саласындағы әлемдік жетекші ғылыми және кәсіби ұйымдардың бірі. Конгресс жыл сайын әлемнің түкпір-түкпірінен келген ғалымдарды, клиницистерді және денсаулық сақтау мамандарын біріктіріп, инфекциялық аурулардың алдын алу, диагностикасы мен емдеудегі заманауи жетістіктерді, вакцинопрофилактика мәселелерін және қоғамдық денсаулық сақтаудың өзекті бағыттарын талқылауға мүмкіндік береді.
Конгресс аясында Израиль мемлекетінің танымал ғалымы, педиатриялық инфекциялар мен вакцинология саласындағы халықаралық деңгейдегі сарапшы профессор Ron Dagan-ның баяндамасы ерекше қызығушылық тудырды. Өз дәрісінде профессор респираторлық-синцитиальды вирус (RSV) пен Streptococcus pneumoniaeарасындағы өзара әрекеттестікке қатысты заманауи ғылыми деректерді ұсынды. Баяндамада RSV инфекциясының тыныс алу жолдарындағы пневмококк колонизациясын күшейтіп, ауыр бактериялық асқынулардың даму қаупін арттыруы мүмкін екендігі көрсетілді. Ұсынылған нәтижелер респираторлық инфекциялардың алдын алуда кешенді тәсілдің маңыздылығын, оның ішінде пневмококк инфекциясына қарсы вакцинацияны және RSV профилактикасының жаңа стратегияларын енгізудің қажеттілігін айқындады.
ESPID 2026 конгресіне қатысу халықаралық ғылыми қауымдастық ұсынған соңғы зерттеу нәтижелерімен, клиникалық ұсынымдармен және инновациялық медициналық технологиялармен танысуға мүмкіндік берді. Алынған білім Қазақстандағы ғылыми зерттеулерді, медициналық білім беруді және дәлелді медицина қағидаттарына негізделген клиникалық тәжірибені одан әрі дамытуға ықпал етеді.
Радмила Цой когнитивтік бұзылыстар, деменция, цифрлық денсаулық сақтау және салауатты қартаю мәселелеріне арналған ғылыми зерттеулермен белсенді айналысады. Ол халықаралық ғылыми жобаларға қатысып, егде жастағы адамдардың денсаулығын жақсартуға бағытталған пәнаралық ынтымақтастықты дамытуға үлес қосып келеді.
Алынған CME/CPD сертификаты маманның үздіксіз кәсіби дамуға, халықаралық озық тәжірибені клиникалық қызметке, ғылыми зерттеулерге және медициналық білім беру жүйесіне енгізуге деген ұмтылысын көрсетеді. Осындай халықаралық ғылыми форумдарға қатысу Қазақстан мен әлемдік медициналық қоғамдастық арасындағы ынтымақтастықты нығайтып, денсаулық сақтау саласына дәлелді медицинаға негізделген инновациялық тәсілдерді енгізуге ықпал етеді.
