«Ыңғайсыз бір қозғалыс және өмір бойы мүгедек болып қалуыңыз мүмкін» – дәрігер эмоционалды түрде скутерлердің жүргізушілеріне жүгінді
Жуырда синоптиктер Алматыда күн ерте жылынады деп болжады. Бұл дегеніміз, жақын арада қала жолдарында жаппай электр скутерлердің әуесқойлары жүре бастайды. Енгізілген шектеулерге, бөлінген жолақтар жасауға, бұл көлікпен жүрудің жаңа ережелерін қабылдауға қарамастан жол-көлік оқиғалары мен жарақат алған жүргізушілердің саны азайған жоқ. Біз Қазақстан травматологтар қауымдастығының вице-президенті, С.Ж.Асфендияров атындағы ҚазҰМУ травматология және ортопедия кафедрасының меңгерушісі Қанат Тезекбаевтан негізінен скутерлердің жүргізушілері қандай жарақаттар алады және мұндай зиянсыз көлік өмірге қандай қауіп төндіруі мүмкін екенін сұрадық.
«Әдетте, бізге жастар түседі. Олар жаяу жүргіншілер өткелінде де, бір-бірімен де соқтығысып жатады. Көбінесе түтікшелі сүйектің жабық және ашық сынуы, жіліншек сынуы сияқты жарақаттар болады. Егер қол созылған күйінде түссе, білек сынады. Бір жерде ота жасау қажет, біреудің сынықтарын салу қажеттілігі түсінікті. Кей жағдайда бас ми жарақаттары, ауыр жарақаттардың араласуы болады», – деді травматолог.
Маманның айтуынша, скутер жүргізушілері көбінесе қауіпсіздік ережелерін сақтамайды, қорғаныс құралдарын кимейді. Ал, электр скутерлердің өзі әдетте жолдың кедір-бұдырларына да, басқа көліктермен соқтығысуға да өте тұрақсыз. Тіпті төмен жылдамдықта мәселен, автомобильмен кішкене жанасу өте қатты құлауға әкеледі.
«Ыңғайсыз бір қозғалыс және өмір бойы мүгедек болып қалуға болады. Мен скутерлердің жүргізушілерін жол ережелерін сақтауға, жолда сақ болуға шақырамын», – деді травматолог.
Өткен жылы Алматы қаласында электр скутермен келе жатқан қыз апаттан қайтыс болды. Ал 2019 жылы Астана қаласында скутерден құлағаннан азамат асфальтқа басын ұрып, комаға түсті. Полицияның мәліметінше, өткен жылы Алматыда скутер мен мопед жүргізушілерінің қатысуымен 77 жол-көлік оқиғасы орын алған.
