ҚазҰМУ-дың интерндері «Қазақстандағы 100 жаңа есім» жобасының жеңімпаздарымен кездесті

«Рухани жаңғыру» бағдарламасы аясында Алмалы ауданының әкімшілігінің ішкі саясат басқармасының қолдауымен 2018 жылы 2 наурыз күні С.Ж.Асфендияров атындағы ҚазҰМУ-дың интерндері «Қазақстандағы 100 жаңа есім» жобасының жеңімпаздары  Айтқожина Ләззат Кенжебайқызы және Қуандықов Тілеуберді Кеңесбайұлымен кездесті.

Іс-шараны ұйымдастыруға университетіміздің жастар саясаты басқармасы, дипломнан кейін білім беру факультеті және аталған факультетінің профессор-оқытушылар құрамы ат салысты. Аталған іс-шараға БАҚ өкілдері де қатысты.

Елбасы Н.Ә.Назарбаевтың «Болашаққа бағдар: рухани жаңғыру» атты мақаласынан бастау алған «Қазақстандағы 100 жаңа есім» жобасының жеңімпаздары  А.Н. Сызғанов атындағы ұлттық ғылыми хирургиялық орталығының Анестезиология және жан сақтау бөлімшесінің басшысы Тлеуберді Кеңесбайұлы Қуандықов және Репродуктивті медицина институтының репродуктолог-дәрігері Ләззат Кенжебайқызы Айтқожинамен болған кездесу өте қызықты өтті. «Қазақстандағы 100 жаңа есім» жобасының жеңімпаздары  қатарына кірген қонақтарымыз медицина саласының қызметкерлері болғандығы кездесуге келген интерндердің қызығушылығын тудырды. Қонақтар өздерінің өмірбаяндарын, медицина саласында жеткен жетістіктерін, алдарына қойған міндеттері туралы айтып берді. Бұдан кейін кездесу сұрақ-жауап түрінде өтті. Білім алушылардың көптеген сұрақтарына қонақтарымыз нақты жауаптар берді.

Кештің негізгі мақсаты – тәуелсіздік дәуірінде еліміздің көркеюіне үлес қосқан азаматтарды университетіміздегі білім алушылармен таныстыру, олардан үлгі алуға жетелеу болатын, сол мақсатымыз іске асты деген ойдамыз.