ҚазҰМУ және ASBIS Kazakhstan цифрлық медицина және медициналық білім беру саласындағы ынтымақтастық перспективаларын талқылады
2026 жылғы 20 тамызда С.Ж. Асфендияров атындағы Қазақ ұлттық медицина университетінде университет басшылығының ASBIS Kazakhstan өкілдерімен және Apple компаниясының білім беру шешімдері бойынша арнайы шақырылған сарапшысы Гаянэ Вальчевскаямен жұмыс кездесуі өтті.
ASBIS – Еуропа, Таяу Шығыс және Африка нарықтарында қызмет ететін ақпараттық-коммуникациялық технологиялар саласындағы халықаралық дистрибьютор және шешімдер жеткізушісі. Компания Apple компаниясымен ынтымақтасады және өзінің еншілес компаниялары арқылы бірқатар елдерде, соның ішінде Қазақстанда Apple өнімдерінің уәкілетті дистрибьюторы болып табылады. Гаянэ Вальчевская Apple компаниясының білім беру жобаларына және технологиялық шешімдерді білім беру ортасына енгізу маманы.
Кездесу заманауи цифрлық білім беру кеңістігін дамытуға, медициналық білім беруге технологияларды енгізудің халықаралық тәжірибесіне, сондай-ақ болашақтың цифрлық медицинасы үшін мамандар даярлау перспективаларына арналды.
ҚазҰМУ тарапынан кездесуге Басқарма Төрағасы – Ректор Марат Едігеұлы Шоранов, университет проректорлары және жасанды интеллект саласындағы маман, ал ASBIS Kazakhstan тарапынан цифрлық трансформация, корпоративтік және білім беру технологиялық шешімдері саласындағы мамандар қатысты.
Кездесу барысында Гаянэ Вальчевская Apple шешімдерін білім беру саласында қолданудың халықаралық тәжірибесін, соның ішінде оларды медицина мамандарын даярлау үдерісіне интеграциялау мүмкіндіктерін таныстырды. Білім беру үдерісі мен клиникалық даярлықта iPad, iMac, MacBook және Mac Studio құрылғыларын пайдалану перспективалары, сондай-ақ құрылғыларды орталықтандырылған басқару және деректер қауіпсіздігін қамтамасыз ету құралдары қарастырылды.
Тараптар Қазақстандағы цифрлық денсаулық сақтауды дамыту мәселесіне ерекше назар аударды. ҚазҰМУ ректоры Марат Шоранов денсаулық сақтау жүйесінің қолданыстағы цифрлық инфрақұрылымы, медициналық ақпараттық жүйелерді пайдалану және университеттің клиникалық базаларында интерндер мен резиденттерді даярлау ерекшеліктері туралы айтып берді.
Кездесудің негізгі мәселелерінің бірі ҚазҰМУ базасында Apple шешімдерін пайдалана отырып, мамандандырылған оқу орталығын құру және болашақта тиісті уәкілетті мәртебе алу мүмкіндігі болды. Осы бастама аясында оқу кеңістігін заманауи техникамен жабдықтау, университет оқытушылары мен мамандарын даярлау, оның ішінде Swift бағдарламалау тілінде әзірлеу бағыты бойынша оқыту, сондай-ақ цифрлық медицина саласындағы құзыреттерді одан әрі дамыту мүмкіндіктері талқыланды.
Бастаманы іске асыруға арналған ықтимал алаңдардың бірі ретінде шамамен 270 орынға есептелген және білім беру бағдарламаларын, тренингтер мен мамандандырылған оқытуды өткізуге әлеуеті бар ҚазҰМУ-дың қолданыстағы тестілеу орталығы қарастырылды.
Жұмыс кездесуінен кейін ASBIS Kazakhstan өкілдері мен Гаянэ Вальчевская ҚазҰМУ-дың тестілеу орталығына барып, оның инфрақұрылымымен, техникалық мүмкіндіктерімен және кеңістіктің ұйымдастырылуымен танысты. Тараптар тікелей алаңда оны жаңғырту және бірлескен білім беру мен технологиялық бастамаларды іске асыруға бейімдеудің ықтимал нұсқаларын талқылады.
Делегация сондай-ақ ҚазҰМУ Студенттерге қызмет көрсету орталығына барып, білім алушыларға қызмет көрсету үдерісінің ұйымдастырылуымен және университетте қолданыстағы цифрлық шешімдермен танысты.
Кездесу қорытындысы бойынша тараптар бастаманы одан әрі пысықтауға, болашақ орталықтың ықтимал форматы мен орналасатын орнын айқындауға, оны техникалық жабдықтау және ҚазҰМУ мамандарын даярлау мүмкіндіктерін қарастыруға уағдаласты.
Бірлескен бастамаларды іске асыру ҚазҰМУ-дың цифрлық білім беру ортасын дамытуда, медицина кадрларын даярлауға заманауи технологиялық шешімдерді енгізуде және болашақ мамандардың цифрлық денсаулық сақтау саласындағы жаңа құзыреттерін қалыптастыруда маңызды қадам болуы мүмкін.
