31 мамыр – қуғын-сүргін және ашаршылық құрбандарын еске алу күні
С.Ж. Асфендияров атындағы Қазақ ұлттық медицина университетінің оқытушылары, білім алушылары мен қызметкерлері 31 мамыр – қуғын -сүргін және ашаршылық құрбандарын еске алу күніне орай дәстүрлі түрде өткізілетін тарихи-танымдық іс-шара, 1937-38 жылдары репрессияға ұшыраған арыстарымыздың рухына тағзым ету мақсатында Жаңалық елді мекенінде орналасқан ескерткішке барып гүл қою рәсімін өткізді.
1997 жылдан бастап «31 мамыр – саяси қуғын-сүргін құрбандарын еске алу күні» болып ресми бекітілген болатын. Деректер көзіне сүйенсек 1936-1938 жж. Қазақстан бойынша 103 мың адам қуғын-сүргінге ұшырап, олардың 25 мыңы атылған. Тізімдегі 631 атылған адамның 80 пайызы қазақтың белгілі ұлт зиялылары: ғалымдар, мәдениет және саясат саласының қайраткерлері Алаш арыстары еді.
Жиын барысында студенттер жазықсыз атылған ардақтылардың ұрпақтарымен кездесіп естелік әңгімелерін тыңдап, Іле аудандық кітапхананың ұйымдастырған көрмедегі кітаптарымен танысты.
Бұл іс-шараның басты мақсаты өткен ғасырдағы елдің басынан кешкен қиындығы мен ауыр тағдыры туралы айта отырып, Алаш арыстарының жазықсыз жаламен репрессия құрбанына айналып, ал олардың әйелдері халық жауының жары ретінде Ақмола лагеріне жабылып, сол бір соқыр саясаттың құрбандарына айналғанына көз жеткізу.
Қазақ үшін қайғы-қасіретті, тарих бетінде өз таңбасы қалған бұл жылдарды еш ұрпақ ұмытпақ емес.
Біздің борышымыз – осы қанқұйлы жылдардың оқиғасын, оның жазықсыз құрбан болған азаматтарының есімдерін ұмытпай, мәңгі есте сақтап, жас ұрпақ санасына бабалар аңсаған тәуелсіздікті, Қазақстанымыздың көркейіп, гүлдене түсуіне өз үлестерін қоса отырып, бейбіт өмірді бағалай білуге тәрбиелеу.
Университет этикалық кеңесі
Жастар саясаты басқармасы
