Reaxys — ғылыми зерттеулер мен дәрілік препараттарды әзірлеуге арналған инновациялық платформа: С.Ж. Асфендияров атындағы ҚазҰМУ-дағы мастер-класс
С.Ж. Асфендияров атындағы Қазақ ұлттық медицина университетінде 2026 жылғы 19 мамырда Фармация мектебінің 75 жылдығына арналған «Фармациядағы цифрлық технологиялар: білім, ғылым және өндірістің интеграциясы» атты халықаралық ғылыми-практикалық конференция аясында Life Science бағыты бойынша клиенттермен жұмыс жөніндегі аға өңірлік менеджер (Мысыр) Pola Girgis Labib Abdelsaied «Reaxys платформасын қолдана отырып дәрілік препараттарды әзірлеудің негізгі міндеттерін шешу» тақырыбында мастер-класс өткізді.
Іс-шара ғылыми зерттеулер мен дәрілік препараттарды әзірлеуде заманауи цифрлық технологияларды қолдануға қызығушылық танытқан оқытушыларды, жас ғалымдарды, докторанттарды, магистранттарды, студенттерді және фармацевтика саласының мамандарын біріктірді.
Мастер-класс барысында қатысушылар ғылыми зерттеулер мен дәрілік препараттарды әзірлеуде қолданылатын Reaxys платформасының заманауи мүмкіндіктерімен танысты. Болашағы зор қосылыстарды іздеу, биологиялық белсенділікті талдау, ғылыми жарияланымдар мен патенттік деректерді зерттеу құралдары, сондай-ақ дәрілік заттардың синтезін оңтайландыру тәсілдері ұсынылды. Практикалық мысалдар негізінде зерттеушілерге ғылыми ақпаратты тиімді талдауға және дәрілік препараттарды әзірлеу үдерісінде негізделген шешімдер қабылдауға мүмкіндік беретін цифрлық шешімдер көрсетілді.
Reaxys платформасының келесі артықшылықтарына ерекше назар аударылды:
- ғылыми жарияланымдар мен патенттердің халықаралық дерекқорына қолжетімділік;
- химиялық қосылыстарды іздеу және олардың қасиеттерін талдау;
заттардың құрылымы мен биологиялық белсенділігі арасындағы байланысты зерттеу; - синтездің оңтайлы жағдайларын таңдау;
- химия, фармация және биотехнология салаларындағы пәнаралық зерттеулерді қолдау;
- ғылыми-зерттеу қызметінің тиімділігін арттыру.
Мастер-класс конференция қатысушылары арасында үлкен қызығушылық тудырып, фармацевтикалық зерттеулер саласындағы заманауи цифрлық шешімдер мен кәсіби тәжірибе алмасудың тиімді алаңына айналды. Reaxys платформасының мүмкіндіктерін пайдалану ғылыми әзірлемелердің сапасын арттыруға, зерттеу тәсілдерін жетілдіруге және дәрілік препараттарды жасау саласындағы инновациялық бағыттарды дамытуға ықпал етеді.
