Қазақстан медициналық санитарлық алғашқы көмектің отаны болып саналады – министр
Қазақстанның денсаулық сақтау министрі Ажар Ғиният ДДҰ Еуропалық өңірлік бюросының директоры Ханс Клюге Алматы мен Астананың декларацияларын ілгерілетуге көрсеткен қолдауы үшін алғыс білдірді. Бұл туралы ол ҚазҰМУ студент жастармен «Денсаулық сақтау жүйелеріміздің болашағы: медициналық-санитарлық алғашқы көмектің беделі, мотивациясы, құзыреттері» тақырыбында өткен кездесуде мәлімдеді.
«Өңірлік директор өз қызметіндегі алғашқы аптада Қазақстанға жұмыс сапарымен келді. Бұл Еуропалық бюро мен өңірлік директордың Қазақстанмен ынтымақтастыққа ерекше мән беретінінің айғағы», – деді ол.
Министр 1978 жылғы Алматы декларациясы мен 2018 жылғы Астана декларациясы туралы негізгі халықаралық құжаттарды еске салды. Екі декларацияда бүкіл әлем бойынша алғашқы медициналық-санитарлық көмекті енгізу және күшейту үшін әлемнің барлық елдеріне тиімді шаралар қабылдауға шақыру бар. Басқа елдер мен олардың үкіметтері халықты физикалық және қаржылық жағынан қол жетімді сапалы медициналық көмекпен қамтамасыз етуге келісті.
«Декларация тек дәрігерлерге, саясаткерлерге ғана емес, бүкіл әлемдегі студенттерге де белгілі. Сондықтан Қазақстан медициналық қоғамдастықтың алдында 40 жылдан астам уақыт бойы МСАК отаны болып саналады және оның дамуымен ұштасып келеді.
Біз ДДҰ бірлесіп 2008 және 2013 жылдары Алматы МСАК декларациясының қабылданғанына 30 және 35 жыл толуына арналған мерейтойлық конференциялар өткізген кезде ДДҰ Еуропалық бюросында қызмет атқарған доктор Ханс Клюге осы іс-шараларды қолдады, оларды дайындау мен өткізуге белсенді қатысты. Ол Қазақстан үшін ардақты және қадірлі қонақ болып қала бермек.
2015 жылы әлемнің барлық елдері тұрақты даму саласындағы 17 мақсатты қабылдады. Үшінші мақсат – салауатты өмір салтын қамтамасыз ету және кез-келген жастағы барлық адамдар үшін әл-ауқатқа ықпал ету халықты денсаулық сақтау қызметтерімен жалпы қамтуды қамтамасыз ету индикаторын қамтиды.
Осы мүмкіндікті пайдалана отырып, Ханс Клюге мырзаға және ДДҰ Еуропалық бюросының командасына Қазақстанның бастамаларын, соның ішінде Астананың декларациясын халықаралық деңгейде ілгерілету жөніндегі бастамаларын қолдағаны үшін алғыс айтқым келеді», – деді министр.
ҚазҰМУ базасында 2015 жылдан 2021 жылға дейін ДДҰ Еуропалық бюросының алғашқы медициналық-санитарлық көмек жөніндегі кеңсесі жұмыс істеді. Осы кеңседен 54 елдегі ұйымның жұмысы үйлестірілді. Алматыда ДДҰ кеңсесінің ашылуы Қазақстанға екі жақты жобаларды кеңейтуге мүмкіндік берді: мұнда ғылыми-практикалық зерттеулер, дәрігерлерге арналған тренингтер өткізілді.
